АҚШ президенти Доналд Трамп томонидан Хитой товарларига божларнинг оширилиши ортидан iPhone смартфонлари нархи кескин ошиши кутилмоқда, деб хабар берди Reuters агентлиги.

Хитой маҳсулотларига 54 фоизлик бож жорий этилиши ортидан Apple мушкул танлов қаршисида қолди: ширкат ё товарлар нархини кескин ошириши, ёки камтарона фойдага қаноат қилиши керак бўлади.

Таҳлилчилар Apple ширкатининг бутун дунёда харидоргир бўлган маҳсулотлари 30-40 фоизга қимматлашишини башорат қилмоқда. Бунинг дастлабки аломатлари аллақачон намоён бўлди: пайшанба куни компания акциялари 9,3 фоизга арзонлади. Бу пандемия давридан буён кузатилмаган пастга шўнғишдир.

Трамп бошлаган савдо уруши сабаб ҳозирда энг арзон саналган iPhone 16 смартфони нархи 799 доллардан 1142 долларга, 1599 долларлик Pro Max русумли қурилмалар эса 2300 долларга ошиши айтилмоқда.

Трамп биринчи президентлик даврида ҳам компанияларни ишлаб чиқаришни АҚШга кўчиришга мажбурлаш учун божлар жорий қилган, аммо ўшанда Apple ширкатига истисно тариқасида божлар татбиқ этилмаган эди.

Apple ҳар йили дунё бўйлаб 220 миллиондан зиёд iPhone смартфонларини сотади. АҚШ, Европа ва Хитой ширкатнинг асосий бозори ҳисобланади. Смартфон нархининг ошиши ортидан Samsung ширкатининг мавқеи мустаҳкамланиши кутилмоқда.

Аввал хабар берганимиздек, АҚШ президенти Доналд Трамп 2 апрель куни 183 давлат, жумладан, Ўзбекистонга 10 фоиздан 50 фоизгача миқдорда импорт божларини жорий қилди.

Бунинг ортидан АҚШ фонд бозори бир кунда қарийб 3 триллион доллар йўқотди.

Фонд бозорлари кескин қулаши сабаб дунёнинг энг бадавлат 500 кишиси 208 миллиард долларни бой берди.

Дарвоқе, Оқ уйнинг савдо урушига жавобан Хитой АҚШдан келтириладиган барча маҳсулотларга қўшимча 34 фоизлик бож жорий қилди. Расмий Пекин фикрича, АҚШнинг бож сиёсати «халқаро савдо меъёрларини бузади ва Хитойнинг қонуний ҳуқуқ-манфаатларига зиён келтиради».

Маълумот ўрнида, 2024 йилда Хитой ва АҚШ ўртасидаги савдо айланмаси 688 миллиард долларни ташкил этган.