Экологик муаммолар сабаб Оролбўйи аҳолисининг буйрак, жигар ва бурун касалликлари билан хасталанаётгани, болалар юракнинг туғма нуқсони билан туғилаётгани ҳақида кўп эшитамиз. Қардош қўшниларга таалуқли саломатлик масалаларини бартараф этиш учун Бухоро вилоят Соғлиқни сақлаш бошқармаси ташаббуси билан Қорақалпоғистон Республикаси Хўжайли туманида тиббий кўрик ташкил этилди. Ушбу туманда тиббий хизмат кўрсатиш сифатини ошириш ва аҳоли саломатлигини яхшилаш учун Бухоро вилоятидан тажрибали мутахассислар жалб этилди. Хусусан, 24 нафар шифокор ҳамда 6 нафар бош ҳамширадан иборат гуруҳ туман кўп тармоқли марказий поликлиникасининг 3-филиалида ўз фаолиятини бошлаган.

«Маълумки, тиббиёт соҳасида тажриба ва малакани амалий равишда татбиқ этиш аҳоли саломатлигини яхшилашда муҳим аҳамият касб этади. Бухоро вилояти Соғлиқни сақлаш бошқармасига қарашли даволаш-профилактика муассасаларининг 30 нафар малакали мутахассислари Қорақалпоғистон Республикасининг Хўжайли туманига келдик. Ушбу тиббий сафар Қорақалпоқ маҳаллий аҳолисини тиббий кўрикдан ўтказиш, юқори технологик жарроҳлик амалиётларини бажариш ва касалликларни эрта аниқлаш мақсадида ташкил этилган. Тиббий сафар давомида маҳаллий аҳолининг саломатлигига оид муаммолар аниқланиб, уларнинг самарали даволаниши учун барча шароитлар яратилди. Бухоро тиббиёти мутахассисларининг тажрибаси Хўжайли туманидаги тиббий хизмат сифатини янада оширишга хизмат қилади, деб ўйлайман. Ҳамкорликдаги лойиҳалар келгусида ҳам давом эттирилиши режалаштирилган ҳамда бундан аҳолининг тиббий хизматдан мамнун бўлиши, соғлиғининг яхшиланиши мақсад қилинган»,-деди Бухоро вилоят Соғлиқни сақлаш бошқармаси бошлиғи Элёр Олтиев.

Билдирилишича, Хўжайли туманида 128 мингдан зиёд аҳоли истиқомат қилади. Кўп тармоқли марказий поликлиниканинг ҳам 3 та филиали мавжуд бўлиб, 5 та оилавий шифокорлик пунктига эга. Хўжайли туманининг Парвоз маҳалласига қарашли  КТМП -2 ҳамда КТМП-3 филиалларида мутахассислар томонидан аҳолига замонавий тиббий хизмат кўрсатиш мақсадида мобил офталмологик поликлиника, «Ўпка саломатлиги» мобил автомашинаси, шунингдек, УЗИ, ЭКГ ва лаборатор текширувлар ташкил этилган. 3 та ишчи гуруҳга бўлинган ҳолда чуқурлаштирилган тиббий фаолият юритган шифокорлар томонидан мингдан зиёд аҳоли тиббий кўрикдан ўтказилган. Улардан 187 нафар фуқарога амбулатор шароитда, 77 нафарга эса туман шифохонасида стационар шароитда даволаниш учун тавсиялар берилган. 5 нафар бемор жарроҳлик амалиётига йўналтирилган.

«Юқори малакага эга бухоролик шифокорларнинг Оролбўйига, биз каби саломатлигидан ташвиши бўлган аҳоли вакилларига мадад бўлиб келганидан жуда миннатдормиз. Менда жарроҳлик амалиётини ижобий ўтказган шифокор ва унга ёрдам берган барчани дуо қиламан»,- дейди Танури маҳалласи фуқароси Абул Элдесов.

Қорақалпоғистон аҳолисига тиббий ёрдамни янада самарали етказиб бериш, малакали шифокорлар тажрибасидан фойдаланиш ва тиббий хизмат кўрсатиш сифатини оширишга қаратилган бу каби чуқурлаштирилган тиббий кўриклар аҳолининг соғлиғини яхшилаш, касалликларни эрта аниқлаш ва олдини олишда муҳим аҳамиятга эга. Оролбўйи  аҳолиси учун ташкил этилган ушбу ташаббус беморларнинг ўз саломатлигига эътибор қаратишига, ўз вақтида муолажа олишига ва тиббий хизматлардан янада самарали фойдаланишига имкон яратади. 

«Ўзбекистоннинг юраги бўлган Қорақалпоғистоннинг чекка бир овулида яшайман.  Қардошларимиз бизнинг саломатлигимизни ўйлаб, чўллар, йўллар оша келишибди. Аҳоли ўртасида соғлом турмуш тарзини тарғиб этишга қаратилган тиббий кўриклар, тиббий муолажалару операция жараёнларидан ташқари, спорт тадбирларини ҳам ташкил этишгани бизни жудаям хурсанд қилди.  Қардошларини ўйлаган қардошларимиз омон бўлсин»,-деди Гулжан Жумамуратова. 

Хўжайлида Бухоро вилоятининг етакчи жарроҳ ва травматологлари томонидан юқори технологик жарроҳлик амалиётлари амалга оширилмоқда.